منتهييييييييي الله يوفقه
==========================
قال : مشينا للمركز" أمن الطرق" نبي نتاكد من حالتك الصحيه ، هم ماسكيني الساعه 11 وفكوني الساعه 2 بعد ماكتبوا على تعهد اني مااركب السيكل !!
قلت له : ليه ماهو من الرياضه والا حرام ؟
قال لي : لا .. بس ماهوب من سلومنا .
قلت : الله يهديك انا خاطب منك !
ابداً لم أجد أي دعم من أي شركة أما من قبل الأفراد بالذات فلم أجد منهم سوى التحطيم اللا محدود واتهامهم لي بأنني (خبل) .
قسم بالله تفطسون من الضحك !!
الولد اسلوبه خبل ومغامراته مضحكه جدأ
السلام عليكم ورحمة الله وبركاته
كيف الشباب اليوم جايب لكم قصة واحد من الشباب زاحف منتهي
في البداية نود أن نتعرف على البطاقة الشخصية :
الاسم : فهد بن إبراهيم بن سعد اليحيى
تاريخ الميلاد: 1/1/1400هـ
الحالة الاجتماعية : أعزب
الوظيفة : خريج المعهد الصحي (دبلوم صيدلة)
الهوايات الأخرى : كرة القدم ، السباحة ، والجري
س- متى بدأت أول رحلة لك ؟ وكيف كان التخطيط لها ؟
ج / بدأت أول رحلة لي وأنا في السنة الثانية ثانوية من الدوادمي إلى القصيم لقصد لعب كرة القدم في عنيزه ، وكانت المسافة 220 كيلومتر ذهاب و 220 كيلومتر عودة .
س- ما نوع الدراجة التي تستخدمها أثناء رحلاتك ؟
ج / في بدايتي استعملت دراجة هوايئة صناعة صينية بمائة وتسعون ، ومن ثم تطور الوضع وأتاني درجة هدية كدعم من الأخ / خالد بن عمر الضويان ماركة ( ويلز ) صناعة يابانية بقيمة ثلاثة آلاف ريال ، وأما الآن ولله الحمد امتلك دراجة ماركة (b.m.w ) صناعة المانية بقيمة خمسة وعشرون ألف ريال اتتني دعم من مركز التراث والثقافة في أبو ظبي بعد زيارة قمت بها لبرنامج شاعر المليون .
س- هل وجدت الدعم والرعاية في رحلاتك ، سواء من خلال الأفراد أوالشركات ؟
ج / ابداً لم أجد أي دعم من أي شركة أما من قبل الأفراد بالذات فلم أجد منهم سوى التحطيم اللا محدود واتهامهم لي بأنني (خبل) .
س- أثناء قيامك بالرحلات لا بد أن تحمل هذه الرحلات العديد من المفاجآت والصعوبات .. فهل تستطيع أن تذكر لنا شيئاً منها ؟
ج / المواقف كثيرة ومنها
------------------------------------------------------
بدايتي مع المغامره
في المرحلة المتوسطة في سن الخامسة عشر رحنا لاحدى القلبان في (الشعراء) واسمه قليب مرداس انا والشباب وقعدنا نسبح في القليب وكل واحد يبرز موهبته ومدى شجاعته وعزيمته .. جاء واحد من العيال وطبح في القليب ارتفاعها 16 متر فضا وخمسة امتار مويه .
قاموا الشباب وطبوا معه في القليب وكثروا الي طبحوا وجاء واحد من العيال وغير الفكرة وطبح روّاسي (يعني على راسه) ولحقه واحد ثاني من العيال وصارت الفكرة بالنسبة لي عاديه وابغى فكرة جديدة تكون صعبه ومميزه .
وقررت اني اطبح على ورا !!
قالوا الشباب : انت مهبول والا صاحي ؟
قلت : اذا ما نفذتها ماعاد اقدر اجي معكم !
وقعدوا يحاولون إني ماأنفذ اللي في بالي ..
وعلشان اقطع الشك باليقين لقّيت القليب قفاي واوهمت نفسي ان المسافة قريبه علشان يروح الخوف وسميت بالله وما نقزت علشان ما يطقني الجال في الجهة الثانيه وجلست جلوس ودفيت نفسي بجال القليب وتشقلبت الاولى ، والثانيه ما قدرت لان ما عندي أي خبره ولا عمري جربتها ولا كنت اعرف كيف اطيح في الماء لان المسافة كانت طويلة وطحت على ظهري في المويه والماء اذا ما شقيته كانك طايح على صبّه وضربت يدي الجال وانكسرت وانكسر عندي الفك وظلعين في صدري وشعر في فقرة من فقرات الظهر!! وطلعوني الشباب من القليب ما اقدر اتحرك ولا التفت من يمين ويسار تشوفني من ورا وانا امشي تقول هذا عود عمره تسعين او خمسة وتسعين سنه ،
ودوني للمستشفى وعلمني الدكتور بالاصابات كاملة وانهم بينوموني شهرين واسدحوني على بلكاش كان الوقت الظهر ما جاء المغرب الا وانا مال من المستشفى ..
قلت للدكتور : بطلع ؟
قال الدكتور : على مسؤوليتك تطلع من المستشفى .
قلت : حطها في ذمتي بس طلعني .
ومن بكره رحت مع الشباب للقليب لكن ما احرك ساكن !! اويق عليهم وهم يسبحون واستمتع بالتميز اللي حققته ولم ابالي بالاضرار الي لحقتني ، يكفيني الانجاز وحده .
================================================== ========
تحدي العبور إلى البحرين (سباحة)
بعد ما عرف ابوي بقصة القليب نقلني للدمام للدراسة عند اخوي الكبير على اساس يتغير علي الجو ويتغيرون اصدقائي واركز على الدراسة اكثر
بعد ما وصلت للدمام بثلاثة ايام عند سعد اخوي رحنا نتمشى في ضواحي الدمام وكان اخوي سعد يفرجنا على معالمها وبعد المغرب وحنا في الخبر قال تشوفون ذيك الانوار قلنا أي نعم قال هاذيك انوار البحرين تبعد خمسة وعشرين كيلومتر عنا وحاطين لها جسر اسمه جسر الملك فهد ابوريكم اياه بعدين وعلى طول ركبت الفكرة في راسي اني اروح للبحرين سباحة واحقق رقم قياسي وادخل موسوعة جنس للارقام القياسية وبعد ثلاثة أيام نفذت المشروع كنا جالسين على الشاطئ انا وعبدالله اخوي وبدر وابوعثمان، بدر اخوي وعبدالله رجعوا للفراش يشربون الشاهي وبقيت انا وابوعثمان نسبح ونسولف . قلت له : ما تصمل يا ابو عثمان نروح للبحرين سباحه ؟
قال : لا وين صعبه ما نقدر نروح ؟
قلت له : ما فيه شي مستحيل انت اصمل واترك الموضوع علي ! قال : خبل انت والا صاحي ؟
علماً إن ابوعثمان كان أفضل سباح في مدينة الدوادمي من ناحية النفس والسباقات وكان أكبر مني بالعمر وتوه متخرج من دوره عسكريه (يعني فسقان)
وقلت له : ورانا اذا جينا في السباحه تقعد تحدى وتهايط من يسابقني ! من يغرقني ! علشانه مسبح اربعه في سته ؟ هذا حنا في البحر .. ورنا جوداك مهوب تجيود علينا في المسابح . (اخذته العزه بالاثم) وقال : مشينا ننعنبو اللي انت ورعه . ومشينا وكانت الساعه اربع ونصف ويوم صارت الساعه خمسة ونصف من وقت انطلاقتنا ، قال : وش رايك نعود ؟
قلت له : لا وييين صادق انت تبينا نعود الرجعه اصعب من انا نعود الموج ضدنا (انا ما ابيه يرجع) ، وبعدين قطعنا مسافة كبيرة حرام نضيعها وبعدينا اذا وصلنا اعرف انا بنسوي انجاز كبير .
ولزّم : الا نبي نرجع ؟
قلت له : على كيفك تبينا نرجع ما فيه مشكله ! لكن حط في بالك انك اللي منسحب من السباق واذا رجعنا للدوادمي ترى بعلمهم انك انسحبت ولا تجحد .
قال لي : لا خلاص بكمل (ما درى انه تورط) وكملنا السباق .
يوم اظلم علينا الليل .. قال لي : خلاص انا بانسحب خلنا نعود ؟ قلت له : معاد هيب بيدك بتعود عود لحالك انا رايح رايح تبي تخاويني حياك الله ! وصارت الطاره بيدي وقلت له : بسخريه علشان استفزه اذا تعبت تمسك فيني !! قال : معاد الا هي .
وكمل الرحله معي يوم جت الساعه ثمان ونصف بدينا نشعر بالتعب انا وياه وصرنا نسبح على ظهورنا علشان نريح ولكنها فكره ضرتنا انا نرتاح عشر دقائق وترجعنا مسافة بعيده ولا قدامنا أي حل قال ابوعثمان انا بانسدح يوديني الموج لاي مكان وقعد يهاوشني ويقول : انت السبب انا قلت لك خلنا نرجع . وقدرت ظروفه .. وقلت : الشكوى لله وش تبينا نسوي يا ابن الحلال ؟
وقال لي وهو زعلان : انت ورع ومراهق وفاشل .
قلت له : الشكوى لله البحر امامنا والعدو ورأنا والي يموت غريق يعتبر شهيد بإذن الله وانا مثلك قاعد اسبح وتعبان تحسبني جالس على كرسي تبيني اغوص ادور لك ارض تجلس عليها ؟
قال لي : اعقب واخس . وطنشني وجلس يسبح ويهلل .. يوم صارت الساعه عشر وانا اطالع يمين ويسار شفت عبارات يدورون .. قلت له : الظاهر ان فيه عبارات جايتنا ؟ قال : الله كريم وين هي ؟ قلت : مقبله علينا . قال : ورنيها لانه ما يقدر يلتفت من شدة التعب ولفيته جهة العبارات وشافها ورجعته لوضعه الأول ويوم قربت عندنا القوارب . قلت : وش رايك ياابو عثمان تبينا نناديهم او نتوزى عنهم واذا راحت نكمل ؟
قال لي وهو معصب ولا فيه حيل : الله ياخذ عمرك يا ... نادهم !
قلت له : يعني انت منسحب من السباق والا ترى بنتوزى عنهم قال : انا منسحب وحمار اللي رحت معك .. نادهم الله ياخذ وجهك وعلم كل اهل الدوادمي وعلم السي ان ان اذا بغيت بس اهم شي نادهم الله يرحم والديك .
واشرت لهم وشافونا وجونا وانقذونا ، يوم وصلنا للشاطئ قالوا لنا : ان المسافة الي قطعناها تسعة كيلو واللي بلغوا خفر السواحل هم اخواني بدر وعبدالله !
وبعدها قابلت ابو عثمان وهو منهار .. قالت له : تتحدى ؟
قال : والله لو تطب في غضاره ما جيت معك ! وصار ما يداني السباحه وكره الماء . قال تعالى (وجعلنا من الماء كل شيء حي) وعرف الوالد اني رحت للبحرين سباحه .. كلم اخوي وقال له : هو صدق ؟ قال اخوي : هذا اللي صار ! قال : مهبول مهوب صاحي ابعدناه عن قليب مرداس لا يطيح فيها وراح للبحرين سباحه تدرون رجعوه في البر ولا في البحر !
وبعدها رجعت للدوادمي اكمل دراستي فيه وبدأت فكرة السيكل وكيف اسافر عليه .
================== ========
(( أول رحله على السيكل ))
اشتريت سيكل بقيمة ميه وتسعين ريال من محلات الطفل السعيد بالدوادمي على شارع المدارس قلت للمصري : اللي في المحل ان شاء الله انه كويس السيكل ؟
قال بالمصري : ميه الميه يا بيه.
قلت : اقدر اروح عليه للقصيم والرياض ؟
قال بكل تعجب : بالمصري (أيه!!) لا يا بني .. دا بتاع الولاد الصغار في البيت !
واخذت السيكل منه لاني اعرف ان مهوب السيكل اللي بيمشي في الرحله اللي بينفذ الرحله هو اللي راكب على السيكل اذا كان يمتلك الاراده والعزيمه ما يهمه شكل السيكل وبالفعل سافرت عليه .
في البداية كنت اعرف شباب من عنيزه في القصيم قالوا : تجي تلعب معنا كوره ؟
قلت : ما فيه مشكلة .. متى ؟
قالوا : يوم الاثنين تجي !
قلت : خلاص باجيكم على السيكل .
قالوا : خلك عاقل وعساك تجينا على الموتر .
وخذت السيكل بعد صلاة الفجر ومشيت مع طريق عرجا ووصلت نفي قبل الظهر وتغديت في نفي ووصلت دخنه العصر ، وبعد المغرب وانا في عنيزه والساعه تسع ونصف وانا عند الملعب ! وانهبلوا الشباب وبعضهم ما صدق !!
قلت لهم : بكره برجع عليه اللي يبي يلحقني يلحقني !
وكان ما معي الا خمسة وثلاثين ريال من ضمنها قطة الملعب عشرة ريال وفعلاً لعبت كوره ورجعت من بكره وكانت المسافة اربع مية واربعين كيلو رايح جاي وانتشر الخبر في الدوادمي ودرى ابوي .. قال : ان شفتك رايح ثاني مره كسرت رجلينك .
هو من خوفه علي لكن ما يدري وش الطموح اللي في داخلي ورحت ثانيه وثالثه !! وبلغ الشرطه عني . قال : هذا خبل امسكوه .
مسكوني الشرطه وحطوني في الحجز مكلبش وحاولت اتصل ببعض الشباب يطلعوني . قالوا : ما نقدر هذا البلاغ من ابوك لازم هو يجي ويطلعك .
وبعد اربعة ايام جاء ابوي للضابط واقنعه الضابط انه يطلعني لانه ما شاف علي أي سلوك سئ سواء اني اسافر على السيكل وهاوشني ابوي عندهم بعد ما اخذوا علي تعهد اني ما اسافر على السيكل .
وقال لي : يالخبل فشلتنا .. ومشينا للبيت بعدها قال لي : اذا رحت ثاني مره لو للشعرا ابلغ المحافظ نوديك للحاير لانك ما تنفع وشهد اخواني .
وبعد شهرين والطموح يعيش معي ويكبر قررت اني اروح للدمام حتى لو كان الموضوع فيه الحاير وكانت عندي قاعده (شيٍّ لاهو حرام ولا عيب ما فيه مانع تنفذه) حتى لو ما رضى عليه الاخرين مصيرهم راح يرضون .
---------------------------------------------
(( الرحلة إلى الدمام ))
رحلتي من الدوادمي إلى الدمام عن طريق الشعرا الرويضه كنت ادرس في ثالث ثانوي في ثانوية النبوان ورحت للمدير اني ابغى منك ثلاثة أيام رخصه مع الخميس والجمعه تصير خمسة ايام سألني : ليه ؟ قلت له : بروح على السيكل للدمام وان شاء الله خمسة ايام تكفيني ! قال لي : صحيح انت بتروح على السيكل انا سمعت انك تروح للقصيم عليه ؟ قلت : ان شاء الله .. لكن اسمح لي ثلاثة ايام وابشر ! قال لي : رح لك اسبوعين ! وبالفعل مشيت الصباح ولا معي الا ثمانين ريال ، يعني اصرف في اليوم خمسة عشر ريال ، ويوم اقبلت على عروى العصر جوني ثلاثه شباب صغار على ددسن موديل ثلاثه وثمانين ضربوا بوري ولفّو علي يحسبوني هندي او بنقالي وبصراحة ما ألومهم على سيكل ولابس بدله وبالشماغ متلطم !! قالو لي : سلام . قلت : عليكم السلام ، وعرفوا اني سعودي وتغيرت معاملتهم قالوا : من وين جاي يالطيب ؟ قلت لهم : جاي من الدوادمي وبروح للدمام إن شاء الله . قالوا : على سيكلك هذا ؟ قلت : إن شاء الله . قالوا : رجلينك ما تعورك ؟ قال : لا إن شاء الله مافيه إلا كل شي زين ، أنا مستعد للرحلة بتمرينات جاده . قالوا : لي اقلط . قلت : مستعجل . قالوا : تامر شي ؟ ناقص عليك شي ؟ قلت : ابد سلامتكم . قال اصغر واحد فيهم : تبا دخان ؟ وهاوشه الكبير منهم !! قال : يا مهبول هذا رياضي ما يشرب الدخان . ومشوا من عندي .. بعد نصف ساعه جتني سيارة هايلكس موديل الفين وصار يدور رايح جاي حولي . قلت : الله يستر .. ويوم بدا الظلام وقفوا بجنبي وفتح الدريشه وولعوا لمبة السياره الداخليه ، قال لي : معليش يالطيب عسى ما ازعجناك ؟ قلت له : لا خذ راحتك .. وحاولت اتعرف عليهم ، وناظرت الي راكب ورا وكان وجهه مهوب غريب علي ، قلت له : انا قد شفتك وين ؟ قال : ما عرفتني ؟ قلت : لا والله . قال : انا راعي التستن اللي اولا !! قعدت اضحك .. وعرفت انهم اخوياي . قال لي : السواق صحيح بتروح للدمام ؟ قلت ان شاء الله . قال : ممكن نسوي معك لقاء صحفي ابن اخينا صحفي في جريدة الجزيرة يقال له محمد غشام العتيبي . قلت : والنعم .. ما فيه مشكله . قال : وين نلقاك ؟ قلت : شفت الخط الاصفر هذا ! مانيب فاكه الا في الدمام ، انا على سيكل وانت على موتر الحقني . وبعد ثلاثة كيلو جاني جيب (vxr) وكابرس ، وسلمت عليهم قالوا : لا تعبت ممكن نعمل معك لقاء صحفي ؟ واخذوا اسمي وبعض الصور وفكرة الرحلة ، وسألوني إذا ناقص علي شي ؟ قلت : سلامتك .. ومشيت من عندهم وقبل الرويضة تقريباً بخمسة كيلو حسيت بالتعب ووقفت علشان انام ، لاني ما اعرف أحد في الرويضة ولا معي فلوس تكفي إني استأجر غرفة وكنت خايف من الشرطة ونزلت في العبارة ولقيت برميل بترومين وانسدحت في وسطه علشان يكون دافئ لأنا كنا في المربعانية ونمت في البرميل الين الساعة احدى عشر ليلاً وكل شوي قايم ولا قدرت ارقد زين وبكره وراي خط طويل وطلعت من البرميل وركبت السيكل ورحت الرويضه وكنت جايع ورحت باتعشى في المطعم ، ويوم اقبلت على المطعم رحب فيني المصري وقال : تفضل حسبت انه يسوي دعايه لمحله ، دخلت وطلبت ربع دجاجه مع الرز مع انها ما تكفي لكنها على قد الفلوس اللي معي واكلتها كلها مع السلطه اللي معها . وسألت المصري : ما فيه شوي رز زياده ؟ قال المصري : ادّي له نفر . قلت له : لا لا تجيب نفر النفر بثلاث ريال يهز الميزانية لان يوميتي كانت خمسة عشر ريال . قال المصري : ادي لوه دا من عندنا . قلت : دامه مجاني جبه . جابه الهندي وكبّه في صحني من الجوع لقطت اللقمه في الهواء واستغرب الهندي !! اللي يقدم الطلبات ، وخلصت النفر في دقايق تصدقون ياجماعه ولا حبه رز طاحت في السماط لأول مره تصير معي في حياتي !! وكان جنبي واحد جالس يتعشى وقام من عشاه وباقي رز وشوي دجاج ، قلت : حرام النعمه هاذي تترك واستحيت اني اطلب زياده ، ورحت باحاسب ، قلت له : كم الحساب مع اني عارف انه سته ريال ؟ قال المصري : لا يابيه انتا ضيف عندنا ، محمد غشام العتيبي اتصل فينا واحنا مستضيفينك اليوم . قلت : يعني بلاش ؟ قال : ايوه بلاش . قلت : عطني حبه دجاج مع الرز ، والهندي من الخوف رفض يجيب الطلب . قال للمصري يجيبه واكلت الدجاجه وغسلت واثرهم مولمين لي الغرفه والسرير وجميع وسائل الراحه ـ جزاهم الله خير ـ ونمت وقوموني الصباح وجاب لي المصري الفطور ورحت منهم مودعاً بالحفاوة والتكريم ووصلت القويعية قابلت اخوياي عيال البداح هناك وجازت لي الجلسه عندهم وقعدت يوم عندهم يوم نويت امشي الصباح جانا ابوهم بداح وما كان يعرفني وعلمه عبدالمحسن ولده قال يبه هذا فهد اليحيى جاي من الدوادمي بيروح للدمام على السيكل ، وناظرني وهو ملبد ملابس وقال : ما حدك الله يا وليدي في هالبرد ،عود لاهلك . قلت : جزاك الله خير . ومشيت من عندهم ومسكت الخط السريع ووقفني أمن الطرق بعد 10 كيلو تقريبا .. قال لي : من وين جاي ؟ خفت اقول له الحقيقه وياخذني للقسم ويعطل الرحله .. قلت له : انا اتمرن عندي سباق بعد كم يوم إذا هو ممنوع مافي مشكله اوقف قال لي : لا خذ راحتك . وسألني : من انت ؟ قلت له : انا فهد اليحيى من الدوادمي . قال لي أي اليحيى ؟ حسيت انه يعرفنا ، قلت : من انت ؟ قال : معك فايز الرويس من مصده قلت له : ونعم معك فهد اليحيى لاعب في نادي مصده ، يوم دريت انه من الديره ، قلت : ياالطيب والله اني من اليوم وانا العب عليك انا الصراحه جاي من الدوادمي وبروح الدمام على السيكل وكذبت عليك خفت انك تعطل رحلتي او توديني القسم . قال لي : بالعكس ، نعين ونعاون .. وعطاني رقم جواله ، وقال : اتصل فيني اذا بغيت أي مساعده . وكملت طريقي لين الرياض ووصلت للرياض وتوجهت لمخرج 9 عند عيال عمي في الشقه عشان انام واطلع من قريب على طريق الدمام وسالوني عيال عمي : من وين جاي ومن وين رايح ؟ قلت : جاي من الدوادمي ورايح الدمام ان شاء الله . قالوا : على السيكل ياخبل ؟ قلت : مافي شي مستحيل . ونمت وقمت الصباح وكنا يوم الاربعاء والشباب مشوا للدوادمي بعد ماخلصوا الدوام
يتبع القصه
-------------------------------------
وانا مشيت للدمام على الطريق السريع وكانت رحلتي الساعه 9 الصباح وريحت المساء في محطه ساسكو بعد 140 كيلو تقريبا وانتشر خبر الرحله في قصر الجماعه بالليل ودرى ابوي عن الرحله واتصل علي ولقى جوالي مقفل وكان عنده بدر اخوي ، قال : أببلغ الشرطه ؟ قال : بدر ادحر الشيطان ، وفهد قال انه بيجي يوم السبت اذا جاء الاحد بلغ على كيفك . قال : خير ان شاء الله الاحد قريب وانا ماكنت اعرف عن القصه هذي أي شي عرفتها بعد مارجعت . واليوم الثاني مشيت لاكمال الرحله وفي العصر وقف عندي صالون ارامكو رجال عمره فوق الخمسين ، فتح الدريشه وقال لي : (فري فري جود) بالانجليزي طبعا قعد يكلمني بالانجليزي وانا ماادري وش السالفه !! يوم خلص قلت : والله ماادري وش تقول ياابن الحلال ، مير عليكم السلام . قال : الاخ سعودي ؟ وهو مسرور ويضحك ومتعجب ! قلت له : أي نعم وجاي من الدوادمي وباروح الدمام . قال : يعطيك العافيه ، وهذا فخر للسعوديين . وعطاني كرته ، وقال : لازم تزورني في الخبر وانطلقت مكملا الرحله والمعنويات مرتفعه حسيت اني بديت انجح واوصل الفكره للاخرين ومشيت يوم جت الساعه 8 باالليل وألقى لي سياره متعطله وداق الفليشر وقفت سيكلي ورى موتره وربطته باالشبك ومشيت لمّه وطقيت الدريشه عليه وناظرني وهو منهبل وكان معه عياله الصغار وصنم وهو يناظرني !! قلت له : افتح الدريشه ونزل الدريشه شوي .. وقلت له : سلام عليكم . ناظرني .. وقال : بسم الله الرحمن الرحيم انت انس والا جن؟ ضحكت انا وماعرفت اتعامل مع الموقف .. وقلت : انا فهد اليحيى وجاي من الدوادمي . قال : انت من وين طلعت لي ماشفت وراي سيارات ولا انوار ؟ ضحكت .. وقلت له : انا جاي على السيكل شف سيكلي واقف وراك . انهبل زود !! وقال لي : شكرا ماابغى شي ، وسكر الدريشه واصريت الا اني اساعده وقلت له : ياابن الحلال ترى عندي خبره في الكهرباء والميكانيكا يمكن يكون فيوز بسيط واصلحه لك وتوكل على الله ؟ قال لي : لا انا الكفر عندي مبنشر . قلت له : اسهل واسهل .. اصلحه لك . قال : حتى الاستبنه خربانه ! قلت له : مافي مشكله اصلحه لك ! حس ان الموضوع مافي فكه فتح الشنطه وقال : شفها ورى ! وهو مانزل من السياره اخذت الكفر وحطيت اغراضي بشنطته وقلت شوي واجيك ، وقلت له : انتبه لاغراضي تراها معك ورحت للمحطه تقريبا 4 كيلو مسافتها رايح جاي 8 كيلو ورقعت الكفر تيوبلس ونفخته وجيته يوم وصلت له حس ان الموضوع جد ونزل وسلم علي ، وقال لي : معليش يالطيب الصراحه انك هبلتني ! قلت : له ماألومك واسترح بالسياره الين اركب الكفر انا يديني قد توصخت ولاياكلك البرد وركبت الكفر وقام يشكر ويثني على الموقف وعطاني كرته وقريت الكرت ولقيت مكتوب النقيب عبدالرحمن الدوسري . قلت : انت عسكري ؟ قال : أي نعم . قلت : ودك تخدمني ؟ قال : أي نعم تفضل يشرفني قلت : فكني من امن الطرق تراهم اشغلوني .. من وين جاي ؟ من وين رايح ؟ وتشرب شيي ؟ رجليك ما تعورك ؟حنا في الموتر نتعب ! قال لي : ابشر وين يلقونك فيه ؟ قلت : في المحطه هذي واشرت عليها ، ومشى من عندي ورحت للمحطه ونمت بعد ما عشوني اليمنيه اللي في المحطه 3 نفر مندي لحم مجانا كاستضافه ، وقمت الصباح ومشيت من عندهم وطلعت على الخط السريع وجوني أمن الطرق .. قالوا : سلام عليكم .. انت فهد اليحيى ؟ قلت : أي نعم . قالوا : كلمنا زميلنا الدوسري ونبي نرافقك للدمام وباالفعل رافقوني كل نقطه تسلمني للنقطه الثانيه حتى بقي 30 كم تقريبا على الدمام واستلمتني آخر دوريه اللي بتوصلني لشرطه الدمام وكان يدعى العسكري ابو محمد وياالربع ياهو منسم عليه اسئله تفقع الراس مغير من يوم لقيته وهو ينشدني من وين جاي ؟ اهيب ياهذا رجلينك ماتعورك ؟ انا في الموتر ودوامي 4 ساعات افحم !! انت في السيكل ماتفحم !! انا فحمت وانا اناظرك واشعلني باسئلته الواجد !! قلت : خلني اعطيه معلومات تشغله عني !! قلت له : يابو محمد عداد الموتر يشتغل وكالعاده كل ماسألته سألني ! وقلت له : من أدب الكلام الاجابه ثم السوال الذي تريده . قال لي : روح العداد يشتغل . قلت : صفره وامش وراي اذا مشينا كيلو اضرب بوري ! وقال لي : روح .. ومشيت ومن حبه للخبر اسرع عشان يخلص الكيلو ويبدا ينشدني يوم خلص الكيلو ضرب بوري وقفت وجاء جنبي وفتح الدريشه ، وقال : علامك ؟ وقلت له : لحظه قعدت احسب في راسي بعض الاعداد ! قال لي : ابك انت علامك تتمتم فيك شي ؟ قلت له : لحظه الله يهديك بتعرف كل شي الحين خلصت من حسابي وقلت له : يابو محمد ؟ وقال : سم . قلت : تدري كم عدد عيون القطط من الدوادمي الي الدمام على الخط الاصفر ؟ ناظرني بتعجب وذهول واندهاش !! قال لي : اسم الله الرحمن الرحيم الحكومه ماتعرف عددها انت كيف عديتها ؟ قلت : المسأله سهله ، انا حسبت الكيلو كم فيه من حبه وضربته بعدد الكيلوات وهذي مسأله في الرياضيات . قال لي : الرياضيات منتازه ياولد .. قال : انا طالبك ياليحيى علمني اللي في السريع كله كم ؟ قلت له : سهله يابو محمد اضرب 143000 في 4 مسارات يطلع الناتج ! قال : انا ماافهم الرياضيات مامعي الا سادس ليلي وناجح بالواسطه وابن اخي المدير . ضربتها له وعلمته الناتج 570000 حبه ! قال لي : ياولد الرياضيات منتازه نبي نعود للمدرسه على الحرام ان المقاول يوم جاء يكتب العقد انه مسجل 800 وماخذ الفرق الحكومه ماتعرف عددها لي 8 سنوات وانا في الدوام على الحرام اني ماعرفت عددها غير ما جيتني اليوم . ومشينا يوم قربت اوصل الدمام زاد الحماس عندي وكلمني بالمكرفون ، وقال لي : اليحيى تتريح ؟ وانا ااشر له بيدي عشان مايوقف وكررها علي وانا مصر على المواصل وهو ملقوف يبي ينشد وحاكاني باالمكرفون وقال : ياخوي حنا تعبنا . ووقف وخلاني ، واضطريت اني ارجع له وامارس هواياته بالأسئله علي !! وقال لي : ريح واشرب عصير انت علامك ؟ واخيرا وصلنا للدمام عند سعد اخوي واستضافوني في فندق (الهوليدي ان) وبعد عودتي من الفندق قال لي سعد اخوي : ابوي اتصل ينشد عنك . قلت : الله يستر عسى مهوب يقول لك بلّغ والا اسجنه ؟ قال : لا هو مبسوط .. وقال : سلم لي على البطل ، بعد ماشاف المقابلة في جريده الجزيره في الصفحه الاخيره بعنوان (الرحاله اليحيى يستعد للسفر من الدوادمي الى دبي) مع اللي التقيت فيهم في عروى ، وحول لي 60000 ريال مكافأة ودعم للرحله وتحول التوبيخ الى مديح والخبل الى بطل والفشل الى شرف والعار إلى وسام .. كلها عبارات تغيرت بفضل الله ثم بالعزيمه والاصرار وتوظيف القدرة الذاتيه بالشكل الصحيح والقدره الذاتيه عالم آخر يحتاج له شرح طويل وسأحدثكم عنه فيما بعد ، ورجعت للدوادمي ولقيت ابوي مسدد القسايم اللي علي 10200 ريال ومطلع لي جواز سفر وقايل لي رح لايردك الا امريكا . هذا بالنسبه لقصه الدمام واقناع والدي حفظه الله ورعاه ودعمه اللا محدود لي .
=========================
(( رحلة العمرة .. من الدوادمي إلى مكة المكرمة ))
بعد وفاة والدتي رحمها الله واسكنها فسيح جناته بأسابيع قليله قررت الرحيل لأداء العمره عن والدتي على السيكل على الرغم أنها رحمها الله كانت من المؤيدين لرحلاتي قبل وفاتها وكانت جريده الجزيره تحت راسها توريها كل من جاها رحمها الله
طلعت من الدوادمي إلى مكة مرورا بالبجاديه ، وقفوني نقطة تفتيش بالبجاديه ، قال لي العسكري : على جنب ياراعي السيكل !
وقفت .. وقال لي : من وين جاي ؟
قلت : جاي من الدوادمي وباروح لمكه آخذ عمره وباطلع لجده !
وناظرني .. وقال : انت مريض والا سكران انت تستعمل حاجه ؟ قلت : بالعكس .. انا رياضي وعندي طموح .
قال لي : انزل نبي نفتشك . فتش الشنطه وقال : يارياجيل الرجال معه حراماته ويبي مكه انتم علامكم عليه ناظرني خويه قال لي : انت تبي مكه والا تبي شهار حق المجانين يمكن انك تلعب علينا ؟
قلت له : ان شاء الله اني بروح لمكه .
قال : الحكومه لوتكلفني بمهمه على موتر 2003 بهالليل ماسريت تتروح على سيكلك يامريض ؟
قلت له : ان شاء الله وهذا طموحي . وقلت له : اني اخطط على موسوعة قينيس للارقام القياسيه .
قال : قينيس وشنهي قينيس ؟
قلت : هذا كتاب للارقام القياسيه .
قال : هذا كتاب الكفار وش تبا به جانا خويهم وكان راعي موتر شكله كان ريسهم . قال : علامه ابو سيكل وانا واقف بينهم يحسبوني مااعرف لهجتهم كاني هندي بينهم !!
قالوا : تعين المبدول هذا جاي من الدوادمي يبا يروح مكه على السيكل !
قال لي : وش اسمك ؟
قلت : اسمي فهد اليحيى من سكان الدوادمي .
قال : انت اليحيى اللي تتروح لالمانيا على سيكلك ؟
قلت : هو انا وصلت .
قال : يامهبول يامهبول (الفيكسار) يخبط ماوصلها ومكينه الفيكسار 8 سرندل وتخبط ماتاصل المانيا تتروح على سيكلك يامريض ؟
قلت : ان شاء الله .
وكرر علي : انت تستعمل شي ؟
قلت له : لا والله .
قال : اعترف احسن لك ترى بنحللك !
قلت : انا واثق من نفسي وسو اللي تبي .
قال : مشينا للمركز نبي نتاكد من حالتك الصحيه ، هم ماسكيني الساعه 11 وفكوني الساعه 2 بعد ماكتبوا على تعهد اني مااركب السيكل !!
قلت له : ليه ماهو من الرياضه والا حرام ؟
قال لي : لا .. بس ماهوب من سلومنا .
قلت : الله يهديك انا خاطب منك !
وكتبت التعهد وطلعوني ، وكملت رحلتي واخذت العمره وطلعت لجده وكرموني في شركه دله البركه للشيخ صالح كامل ورجعت من بكره بالسياره .
هذه باالنسبه للرحلات الداخليه وفيه بعض الطرائف التي لم تكن ضمن احداث الرحله وساذكرها لكم
يتبع..!
---------------------------------
قصتي مع الهندي ودرج إسكان الدمام
بعد ماواعدني احد الشباب انه بيجيب لي موافقه من رعاية الشباب وكان جاد في كلامه لان ابوه كان مدير رعايه الشباب تحمست وحسيت ان الفرج جاء وفصلت من المدرسه وتفرغت للتمرين وحطيت فلوس المدرسه الاهليه في النادي ويحسبني ابوي ادرس واتمرن بعد العصر الين العشاء في النادي واريح الين الساعه 10 واطلع واركض 10 كيلو باتجاه اسكان الدمام كنت اعرف واحد من الشباب هناك وابدا طلوع الدرج من الساعه 11 وانتهي الساعه 6 الصباح علما ان العماره ارتفاعها 17 دور وكنت اطلع وانزل 50 مره كل يوم لمده شهر علما ان طالع نازل تصير عده وحده من الـ 50 وكان الهندي اللي في العماره يشوفني وانا اطلع وانزل قال لي : وش تسوي ؟
قلت : اتمرن !
قال : انتم ياالسعوديين مخ مافيه .
قلت له : ماتقدر تسوي زيي ؟
قال : انت فلوسك واجد وامك وابوك يصرفون عليك وفلوسكم واجد وانا مسكين لازم اشتغل عشان اجمع فلوس .
قلت له : اذا سويت مثلي يوم واحد بااعطيك 500 ريال !
انهبل .. وقال : موافق خلاص بكره .
جاء بكره وهو جاهز بالملابس الرياضيه وحذرته ان الموضوع خطير وانه مايقدر عليه لان ماعنده لياقه .
قال لي : انت خايف وماتبي تدفع فلوس ومن الاستهزاء اللي فيه قال لي : اذا ماقدرت ابعطيك 200 ريال .
وبدينا نرقى الشاهد انه رقى 10 مرات بعدين وقف في الدور الثامن تقريبا .. قلت له : ياالله ياصديق خلنا نمشي ؟
قال : مافي يقدر رجول عور .. وجلس على ركبه وانسدح !
قلت له : وش فيك قعد يصايح ويقول (هوسبتل..هوسبتل )
سحبته ونزلته في الاصانصير ونزلته تحت ودخلته غرفته ، واتصل على مستشفى تبع الشركه اللي مأمنة لهم وجو بالاسعاف وماقدروا يشيلونه إلا بعد 3 ابر .. جاه تمزف في العضلات ونوم خمسة ايام في المستشفى .. وزرته وتطمنت عليه !! وقلت له : وين الـ200 ريال ؟
قال : انا مسكين خصموا علي الشركه !
قلت له : طيب نفر سعودي خربان والا كويس ؟
قال : نفر سعودي ميه ميه هندي كلو خربان يبي الفكه من الـ 200 ريال وهذه قصه اسكان الدمام ..
------------------------------------
(قصة المسبح والتحدي)
ومن ضمن القصص قصه صارت معي
هذا الله يسلمكم كنا نسبح حنا وعيال عمي في مزرعتنا وجانا فهد اليحيى المهم كنت انا بالنسبه لشباب مسوي فيها افظل سباح ودايم اهايط عليهم المهم اني كنت اقطع المسبح طول رايح جاي رايح يعني ثلاث مرات وكنت اذا خربتها
اقطعها ثلاث مرات ونص واطلع بعدها مافيني قطره ناشف من التعب ولساني طايح جمبي ومنقطع نفسي وحالتي حاله واخذ ربع ساعه الين استعيد نشاطي طبعاً كنت انا اكثر واحد اهايط عليهم لئني كنت اكثر واحد نفس فيهم
المهم جانا فهد وكنا نتحدى وهو مشكلته لاتقوله اتحداك اذا قلت اتحداك عادي مستعد يموت بس ماحد يتحداه قال انا اكثر منك قلت مستحيل قال وش لي قلت ابحط شرط تعجيزي عشان مايقدر يكملها او يموت قبل مايفوز قلت
اذا قطعتها رايح جاي ست مرات ابعشيكم طبعاً بتقولون امحق تحدي بس وش نسوي كنا طفارا مامعنا حق ببسي المهم هو وافق وقعدنا نشوفه وهو غاطس تحت الماء ويروح الاولى والثانيه والثالثه والرابعه وعيوني تقلب من الهبله
ودي انقز واطلعه غصب العشى صح دجاج ويخب بس من وين لي الطفره شينه وفيه كان مجموعه ولله مايفوتون شي اسمه حق يوم رجع الخامسه واشوفه يحوص تحت الماء من التعب ويخلص الخامسه وكن قلبي بيوقف من الخوف وهو يرجع بيكمل السادسه
ويسبح ويكمل وانا منهبل المهم جابها وكمل السادسه بس على وصوله للجدار ولمس الجدار ماطلع من الماء ؟؟؟؟؟؟؟
وين راح
؟
وش جاه
؟
قلنا في الدعوه انا
وانا اقول بخاطري ليته يموت ويفكني من العشى
اتاريه من التعب انقطع نسمه وغرق بالماء نزل اغمى عليه ويطبحون الشباب وراه ويطلعونه والى لون وجهه اخضر على ازرق على جميع الالوان صاير قوس قوزح
المهم ونقعد ساعه نقومه ونحاول فيه اشوى الين صحى بصراحه وقف قلوبنا المهم يوم صحى قلنا بيقول ودوني المستشفى شي وهو يلتفت علي قال نايف لاعاد تتحدى طبعاً هوا كان يقولها وشكله تقول عصفور طاقته العجه وبعدها مطر رايح فيها ودايخ مره ذكرني بقطو مسكه واحد من عيال عمي مع ذيله ويلفه بالهوه خمس طعش لفه ويفكه ويترنح وهو يحلته بالحصى
طبعاً ماحد يعرفه هو رحوم بس ذيك المره مدري وش جاه نرجع لسالفتنا..
قلت ابشر ولله ماعاد اتحدى طيب والحق قال مابيه بس لاتحدى ثانيه وبصراحه قد مانبسطت من انه سامحني عن الحق قد مانقهرو العيال ان الحق راح عليهم...
والسلام ختام وانشالله ماكون طولت عليكم :)
واهم شي انكم تكونون مستانسين :)
[/size]
اذا اعجبتك القصة اترك رد لوسمحت وتقبل تحياتي
rwm ti] hgdpdn ghjt,,,,,,j;
|[ آعلآنآت المنتدىآ ]| 
المواضيع المتشابهه
العرض العادي
